Тропарь, глас 4:

Царскую диадиму обагрил еси кровию твоею, богомудре мучениче, за скиптр крест в руку приим, явился еси победоносец и жертву непорочну Владыце принесл еси себе: яко бо агнец незлобив, от раба заколен еси. И ныне, радуяся, предстоиши Святей Троице, молися о державе сродников твоих богоугодней быти и сыновом Российским спастися.

Ин тропарь, глас 2:

Яко благочестиваго корене боголюбивый произыде плод, яко агня незлобиво, неповинно во младенстве заклан бысть от властолюбца вкупе и злаго раба. Тем, яко златыми крылы, душевною чистотою и младенческим незлобием к Небесней высоте возлетел еси, страстотерпче Димитрие. И ныне кровь твоя от земли тайно вопиет к Богу, яко Авеля праведнаго. Сего ради поклоняемся верою ти, славяще Прославльшаго тя Бога, Егоже моли стране нашей бого­угодней быти и сыновом русским спастися.

Ин тропарь, глас 1:

Всеоружеством Духа благодати вооружен был и необорим столп и утверждение отечеству своему показася, яко агнец незлобивый от врага неправедно заклан быв и в жертву непорочну Господеви принесеся. И ныне дар благодати от всех Подвигоположника прием, источаеши всем исцеление, достохвальне благоверный царевиче княже Димитрие. Слава Восприимшему тя от земных в Небесная, слава Венчавшему тя венцем неувядаемым, слава Действующему тобою всем исцеление.

Кондак, глас 8:

Возсия днесь в славней памяти твоей верным веселие, яко бо доброрасленный грезн (виноградная лоза), прозябл еси и Христу красен плод принесл еси себе; темже и по убиении твоем соблюде тело твое нетленно, страдальчески обагренное кровию. Благородне святе Димитрие, соблюдай отечество твое и град твой невредим, тому бо еси утверждение.

Молитва

О преславный и дивный в чудесех, красото мучеников, страстотерпче царевичу княже Димитрие! Скоро предстани Небесному Царю и мученические твои руце о нас, грешных, молебне к Нему простри, яко имеяй дерзновение велико; сохрани же твоими молитвами град сей и вся грады и веси православныя, и Святейшего Патриарха (имя рек), и преосвященныя митрополиты, архиепископы, епископы и весь священный чин церковный, и в палате братию нашу, и вся православныя христианы; всех нас приими во твое заступление, и от всех бед и зол избавляя, и от нашествия видимых и невидимых борющих нас врагов свобождая, и тех всяк навет и злохитрство погубляя и отгоняя; таже прегрешений наших прощение испроси, и в век будущий Небеснаго Царствия нас сподоби, и спасенных Богу представи, благодатию и человеколюбием Господа и Спаса нашего Иисуса Христа, Емуже честь и поклонение подобает, ныне и присно, и во веки веков. Аминь.