Тропарь, глас 8

В тебе, мати, известно спасеся еже по образу, приимши бо Крест, последовала еси Христу и, деющи, учила еси презирати убо плоть, преходит бо: прилежати же о душе вещи безсмертней. Темже и  со Ангелы срадуется, преподобная Евфросиние, дух твой.

Ин тропарь, глас 4

Святая твоя память Суждальскую страну веселит, верных же вся созывает во всечестный храм твой, идеже ныне совершается всеславная память твоя, Евфросиние преподобная; моли Христа Бога спастися душам нашим.

Кондак, глас 2

Девства чистый сосуд елеем молитвы и любве исполнивши, неугасимый светильник в сердце своем возжгла еси, преподобная,  с нимже бодренно в сретение Небеснаго Жениха изшедши, в чертог Того пресветлый прията была еси; идеже ныне водворяяся с лики Ан­гелов и святых, молися Христу Богу части дев юродивых избави­тися нам.

Ин кондак, глас 6

Женише мой Сладчайший, Христу взываше прекрасная Евф­росиния, ибо сладость любве Товея душу ми надеждею впери и красота милости Твоея сердце ми услади, сопотрудитися страданий по Тебе имея на Тя надежду, да достойну мя чертога с мудрыми девами  и ликовствовати у Тебе причтимся. Темже, преподобная, почитающе подвиг трудов твоих, молим тя: моли незазритися и нам чертогу двери.

Ин кондак, глас 8

Девства чистотою возмогла еси свещу своего разума и просветила еси душевную чистоту, пощением же и бдением плоть поработила еси духу, темже, преподобная Евфросиние, почитающе подвиги трудов твоих, молимся, моли Христа Бога спастися душам нашим.

Молитва

О преславная мати, скорая наша помощница и заступница и неусып­ная о нас молитвенница! Предстояще иконе твоей и на сию со умиле­нием, яко живей ти сущей, взирающе, молимся тебе усердно: приими прошения наша и принеси я ко Престолу Милосердаго Отца Небеснаго, яко дерзновение многое к Нему имущая. Испроси притекающим  к тебе и всем православным христианом вечное спасение и временное благоденствие, на вся же благая дела и начинания наша щедрое благословение, и от всяких бед и скорбей скорое избавление. Ей, чадолюбивая мати наша! Тебе, предстоящей Престолу Божию, ведомы суть нужды наша духовныя и житейская: призри на ны матерним оком, и твоими молитвами вся злая от нас отврати, паче же злых  и богопротивных обычаев умножение. Утверди же во всех веры согласное ведение, взаимную любовь и единомыслие, да во всем житии нашем, словесы же и писании и делы, славится всесвятое имя Отца, и Сына, и Святаго Духа, Единаго Бога, в Троице поклоняемаго, Емуже честь и слава во веки веков. Аминь.