Тропарь, глас 8

Яко непорочная невеста Нетленного Жениха Христа, праведная дева Иулиание, с светлою свещею добрых дел вошла еси в чертог Его Небесный и тамо со святыми блаженства вечнаго наслаждаешися. Тем же моли, Егоже возлюбила еси и Емуже девство твое обручила еси, спасти души наша.

Ин тропарь, глас 2

Девства добротами преочищена и целомудрия цветы венчавшися, богоблаженная дева Иулиание, явилася еси миру и нетленнем телеси твоем, источник исцелений и даров духовных подающе всем к тебе притекающим, и ныне, яко свеща теплая, благодати елеем возженная, предстояще Престолу Господа и Жениха твоего Небеснаго, Того моли, дево чистая, избавити нас от всякаго зла, чтущих память твою верою и любовию.

Кондак, глас 8

Храм Божий одушевленный, девственною чистотою благоукрашенный, вемы тя, святая и праведная дева, княжно Иулиание, темже, с любовию празднующе святых твоих мощей обретение, молим тя, известная желаний наших ходатаице: принеси за нас молитвы твоя ко Господу и от всяких бед свобождай нас предстательством твоим у Престола Всевышняго, да зовем ти: радуйся, дево святая Иулиание, невесто Христова прекрасная.

Ин кондак, глас 8

Приводим Ти, о Всещедре, Иулианию, присносветящую свещу, елеем благодати одержимую, немощным цельбу. Еяже молитвами от всякаго зла свободи нас и спаси всех, иже Тя с поклонением величают.

В тот же день совершается память святого благоверного князя Глеба Всеволодовича Городненского, иже в Киеве.