Тропарь, глас 4

Непорочным священством Богови послужив, посреде мир­скаго мятежа юродство избрал еси, взем бо крест последовал еси Христу, невозвратным помыслом и с любовию к нему приближаяся, земная оставив, небесная восприял еси, блаженне Максиме отче наш, моли Христа Бога сохранитися граду Тотьме невредиму и спастися душам нашим.

Кондак, глас 4

Божественный евангельский глас услышав, радостною душею тому последуя, пришел еси в тихое пристанище безстрастия, частыми молитвами, и постом, и слезными струями душу с телом омывая, воз­душною тягостию плоть умерщвляя, руганием людским помыш­ления смиряя, о нападствующих молился еси: Господи, не постави им греха: тем и по смерти чудесы тя Бог прославляет и всех звати тебе научает: радуйся, богомудре Максиме отче наш.

Молитва

О преблаженне и досточудне угодниче Божий, Максиме праведный! Восприяв благодать Святаго Духа, первее послужил еси непорочным священством Пресвятей Троице, предстоя Престолу Божию и при­нося о людех Безкровныя Жертвы. Егда же, ко Господу крайним же­ла­­нием одержим, юродивое житие Христа ради избрал еси, мирския прелести отринул еси, наготою телесною, якоже багряницею, одеяся, сол­нечный зной и великий мраз с любовию претерпе, подвизаяся
во граде Тотьме, и сего ради наследовал еси Небесный Чертог
в се­­ле­­ниях праведных. Но яко имеяй дерзновение ко Христу Богу, пролей о нас, о святче Божий, теплыя молитвы, да избавимся мы всякия нужды и всякаго сопротивнаго зла. Не престай молити Слова, Христа Бога нашего, о граде и людех, сохранитися им неповрежденным от глада и язвы, огня и меча и от нашествия супостатов. Низпосли с небесе, о священная главо, преблаженне Максиме, на нас, усердно притекающих к тебе и с любовию лобызающих святый образ твой, мир, благодать и спасение душам нашим, да и мы со всеми святыми наследницы будем Небеснаго Царствия, воспевающе купно Святую Троицу, Отца, и Сына, и Святаго Духа, ныне и присно и во веки веков. Аминь.