Тропарь, глас 1

Послушания добрый рачитель быв, преподобне Никоне присно­памятне, Церковь бо прекрасну Святыя Троицы в похвалу отцу твоему воздвигл еси. Тем же и мы, чада твоя, любовию вопием ти: слава Дав­шему ти крепость, слава Венчавшему тя, слава Действую­щему тобою всем исцеления.

Ин тропарь, глас 8

Яко трисветлаго солнца светозарные звезды, Тройческим светом озаряете сердца верных, сосуды Света Пресвятыя Троицы явль­шеся, и предивным вашим житием иноком бысте твердии законо­положителие, и церквам благолепие, и благоверным, и святите­лем, и всем людем, вся бо демонския скверны отгнавше отсюду вашими чистыми учении и делы, добре упасосте стадо, собранное вами, но и ныне молим вас: посещайте чад своих, яко имущие дерзно­ве­ние ко Святей Троице, Сергие с чудным учеником своим Никоном, и молите Христа Бога, да спасет души наша.

Кондак, глас 4

Духовному твоему настоятелю, отче Никоне, всячески прилепився и от него наставляем, ко всем Христови поработився, монахов был еси чиноначальник и преподобных сожитель, с нимиже Христа Бога моли непрестанно о всех нас.

Ин кондак, глас 8

В постницех приобщившеся Великому Антонию и Евфимию Иерусалимскому поревновавше в подвизех, яко Ангели, на земли явистеся, просвещающе, преподобнии, верных сердца Божествен­ными знамении и чудесы повсегда, сего ради радостно вас почитаем и любовию вопием вам: радуйтеся преподобнии отцы, Сергие и Никоне, постником удобрение и всея Российския земли великое утверждение.