Тропарь, глас 4

Первее в Муроме святительством почтен был еси, из негоже неправедно изгоняемь, яко на легкий корабль, возшел еси, на нейже паче естества, яко бесплотен, по водам шествие творя, промышлением Вышняго и заступлением Богоматери управляемь, богоспасаемого града Рязани достигл еси, и в нем архирейства престол восприим, богоданную паству Рязанскую добре упасл еси. Святителю отче наш Василие, моли Христа Бога спастися душам нашим.

Кондак, глас 8

Яко многосветлая звезда, от града Мурома возсиял еси, святителю Василие, по водам же дошед до града нашего Рязани, церковь Божию добре упасл еси, просвещая люди учением и житием твоим. Поминай и ныне чада твоя, молим тя, наставниче наш добрый, и за ны Христу Богу и Пречистей Его Матери молися, да благодарною душею зовем ти: радуйся, угодниче Христов и теплый к Богу о нас молитвенниче.

Молитва

Святителю отче Василие! Дивным шествием твоим по водам и нетлением честных мощей твоих уверившеся, яко имаше велию благодать у Господа Бога, с верою и надеждою к тебе прибегаем и умиленно молим тя: моли о нас Христа Бога нашего, сохранившего тя, якоже Петра, от потопления в волнах речных и от нетления
в сердце земли, да благодать Его спасительная сопутствует нам на всех путех жизни сея, сохраняющи ны невредимы от всякаго злаго обстояния, всякий противный ветер напастей и бурю страстей утоляющи, тихое и безмятежное плавание в житейстем сем мори нам дарующи. Да простит нам Милосердный Господь всякое прегре­шение, вольное и невольное, немощь естества нашего благостию Своею покрывая, да утвердит нас во святей Своей православной вере и благочестии, исполняя сердца наше любве и ревности о соблюдении заповедей Его ко спасению душ наших. Церкви Православно-Росийстей да дарует мир и благоденствие, да возглаголет в сердце правителей наших благая о ней и о всех людях, да ниспослет земли нашей времена мирна, благорастворены воздухи, земли пло­доносие и вся на пользу настоящего жития потребная и да избавит вся грады и веси отечества нашего и всю землю Русскую от всякаго зла, да тако в мире, благо­денствии и преспеянии в добродетелех путь жизни сия прешедше, внидем в вечное Царство, уготованное святым Его. О всехвальный святителю наш и угодниче Христов Василие! Веруем и уповаем, яко можеши молитвами твоими устроити вся благая душам и телесем нашим, имея Помощницу Преблагословенную Владычицу нашу Богородицу, Еяже честною и чудотвор­ною иконою сохраняемь, шествие по водам, яко по суху, совершив, благоспасаемого града Рязани достигл еси. Сего ради прилежно молим тя: не отвержи нас от заступления твоего, потщися на помощь нашу и умоли за ны Господа и Бога нашего Иисуса Христа, избавльшаго тя от злокозненных страстей лукаваго и клеветы человеческия, да, призрев нас милостивно, избавит нас от всякия беды, скорби и болезни душевныя и телесныя и да сподобит нас, грешных и недостойных, Небеснаго Царствия Своего молитвами Пресвятыя Матери Своея и твоим теплым за ны пред­стательством, всегда, ныне и присно и во веки веков. Аминь.

Ина молитва

Богоизбранне первосвятителю наш и угодниче Христов Василие, святостию жития твоего, чудным по водам плаванием и нетлением мощей твоих препрославленне! Предстоя Престолу Вседержителя и имея велие к Нему дерзновение, моли Его, да пробавит милость Свою к нам, грешным и недостойным рабом Своим, и дарует народу здравие, долгоденствие и во всем благое поспешение: пастырем Церкве да подаст духовное трезвение и ревность о спасении пасомых; градоначальником и судиям — страх Божий, правоту и безкорыстие; воином — терпение, мужество и на враги одоление; супругом — взаимную любовь, верность и единомыслие; куплю деющим — праводушие, земледельцем — трудолюбие и трезвенность, сирым — призрение, болящим — исцеление, обидимым — заступление, оклеветаваемым — оправдание и всем людем паствы твоея вся ко временней и вечной жизни потребная. Паче же моли Господа, молитвенниче наш, да простит нам всякое согрешение, вольное и невольное, и очистит от всякия скверны плоти и духа, да избавит от козней исконнаго врага, ненавист­ника и человекоубийцы, и сохранит от клеветы человеческия; да утвердит во истинней спасительной вере и нелицемернем благочестии; да соблюдет от суемудрия и душетленных учений духов лестчих, действующих в веце сем в сынех противления; да охранит сердца наша от прельщения красными мира сего и да научит отрекатися от плотских похотей и страстей, горняя мудрствовати, а не земная. Моли, отче наш, Всесвятаго и Божественнаго Духа, да возсияет свет благодати Его братиям нашим по плоти, во тьме лжеверия седящим, и да познают Христа, Бога Истиннаго, единаго Спасителя всех человек; да возсияет свет сей и блуждающим на распутиях раскола, да вразумятся и приидут во ограду Православныя Церкве, в нейже единей несомненно содеявается вечное спасение верных.
О святителю Христов, молитвенниче наш! Моли Христа Бога и Пречистую Матерь Его, да упразднит вражды наша и нестроения, соединит же вся ны богоподобною любовию, да в мире и единомыслии, желанием спасения горяще, Господеви работающе, друг друга тяготы носяще, добрым подвигом подвизаемся и, течение скончавше, достигнем в тихое пристанище Небеснаго Царствия и прославим неизреченное человеколюбие и милосердие Спасителя нашего Иисуса Христа, Сына Божия, со Безначальным Его Отцем и Пресвятым Духом во веки веков. Аминь.