Тропарь, глас 1

Желанием духовным распалився и мятежи мирския отринув, к Богу любовию прилежно присовокупися. И Того вседушне взыскуя, во внутреннюю пустыню отшел еси, при водах вселился, идеже во слезах и трудех пребывая многолетное время, в терпениих мнозех житие ангельское проходил еси в наставлении Божественнаго разума и множество монахов собрал еси, мудре, ихже, посещая, не остави, Варнаво преподобне, отче наш, Пресвятей Троице моляся от зол всяческих избавити и спасти души наша.

Кондак, глас 8

От юности, преподобне, плоть твою в постех и молитвах истончил еси и, крест твой взем, усердно последовал еси Христу, тем же и к Вышним течение радостно совершил еси, идеже со всеми святыми предстоиши. И ныне стадо твое посещай, поминая чтущих всесвятую память твою, да вси благодарственно вопием ти: радуйся, богомудре Варнаво, наставниче пустынный.

Молитва

О всеблаженне отче, преподобне Варнаво, теплый заступниче и помощниче с верою призывающим тя! Избави нас молитвами твоими ко Господу от всякаго обстояния бесовскаго. Изми нас, окаянных рабов твоих, чудотворче Варнаво, от уст пагубнаго змия, зияющаго пожрети нас и свести во ад живых. Прости нас, отче, елико согрешихом им, исторгни нас от греха и всякия напасти, приходящия грехов ради наших. Подаждь душам нашим утешение, всади в сердца наша страх суда Божия, избави нас от врагов наших видимых и невидимых, тебе бо имамы тепла молитвенника и заступника, еже в бедах сущия и в грехи впадшия. Ты бо явися столп благоче­стия, воздержания правило, смиренномудрия образ, целомудрия наставник, убогими и сиротам заступник и хранитель прибегающим к тебе. Кто убо по достоинству может похвалити равноангельное твое житие и кто может исчести твоих трудов подвиги и слезы ко Господу? Воистину яко солнца светлейши возсия твоя исправления, ревнитель бо бысть всем святым, преподобных и праведных учитель духовный и всем, призывающим тя, молитвенник ко Пресвятей Троице. Ты, яко мира оставил еси и яже в мире, и нас приведи ко Господу молитвами твоими, отче честнейший, да и мы сподобимся вечных благих, ихже наслаждаешися; небесныя славы, желаемаго Иисуса Христа и слад­чайшего Владыки и Господа всех, Емуже подобает всякая слава, честь и поклонение, со Безначальным Его Отцем, и Пресвятым и Благим и Животворящим Его Духом, ныне и присно и во веки веков. Аминь.

В той же день совершается память преподобного Вассиана, Углич­ского чудотворца.