Тропарь, глас 2:

Яко сокровище пребогатое, многолетно в земли сокровенное, честныя мощи твоя обретошася чудоточащия, всеблаженне отче святителю Алексие: от нихже врачевство приемлюще, обогащаемся и Христа славословим, глаголюще: слава Прославляющему святыя Своя.

Ин тропарь, глас 4:

Апостольских преемников архиерее сопрестольниче, России всея пастырю и учителю, всеблаженне отче Алексие, Владыце всех молися мир пастве твоей даровати и спасение душам и велию милость.

Ин тропарь, глас 3:

Свыше от Бога глас глаголющ услышав, от юности подвизався, мудре, в молитвах, и во умилении, и слезах, во бдениих же и пощениих образ быв добродетели, отонюдуже и дом Духу Пречисто­му явися. Сего ради русския митрополии архиерейским саном почтен быв, Христово стадо упасл еси добре, еретическия нападения, не усумнеся, отрази и церкви воздвиже Христови, святителю Алексие, иночествующих лики собра и сих Христови привел еси. Умре же, явися, яко спящ, цел, соблюден бысть пред многими леты, подавая цельбы болящим. Тем молим тя: моли Христа Бога спасти град твой Москву неврежден и страну и православныя люди по велицей Его милости.

Кондак, глас 8:

Яко солнце незаходимое, от гроба возсия нам от мног лет сокровены честныя твоя мощи нетленны, святителю Алексие, тобою благодать приемлем: всю бо страну сию и вся ны чудесы и добротою обогащаеши, действом благодати, да поем ти: радуйся, отче, светило России.

Ин кондак, глас 3:

Яко светоносная память святителя всем разруши уныние и свет облиста Небесных Даров, всех созывающи на веселие: от Бога бо, святителю Алексие, благодать обрете прогонити недуги и вся человеки исцеляти, и мнихом же степень (путь) показася.

Молитва

О пречестная и священная главо и благодати Святаго Духа исполненная, Спасово со Отцем обиталище, великий архиерее, теплый наш заступниче, святителю Алексие! Предстоя у Престола всех Царя и наслаждаяся Света Единосущныя Троицы и херувимски со Ангелы возглашая песнь Трисвятую, велико и неизследованное дерзновение имея ко Всемилостивому Владыце, молися паствы твоея спасти люди, единородный ти язык, благосостояние святых церквей утвер­ди, архиереи благолепием святительства украси, монашествующих к подвигом добраго течения укрепи: град сей (или весь сию, аще во обители — обитель святую сию) и вся грады и страны добре сохрани и веру святую непорочну соблюсти умоли: весь мир умири, от глада и пагубы избави ны и от нападения иноплеменных сохрани нас: старыя утеши, юныя накажи, безумныя умудри, вдовицы помилуй, сироты заступи, младенцы возрасти, немощствующия исцели и везде тепле призывающих тя и с верою притекающих к раце честных и многоцелебных мощей твоих, усердно припадающих и молящих ти ся, от всяких напастей и бед ходатайством твоим свободи, да зовем ти: о богоизбранный пастырю, звездо всесветлая мысленныя тверди, тайнаго Сиона необоримый столпе, миродухновенный цвете райския, всезлатая уста слова, московская похвало, всея России украшение! Моли о нас Всещедраго Человеколюбиваго Христа Бога нашего, да в день страшнаго пришествия Его шуияго стояния избавит нас и радости святых причастники сотворит, со всеми святыми во веки. Аминь.