Тропарь, глас 4:

Подражающи дванадесятолетна дванадесятолетну Христу, учившему во святилищи Божию слову, последовала еси, Евфросиние. Славу временную и земнаго обручника оставльши и вся мирская презревши, краснейшему паче всех Христу себе уневестила еси, крест вземши, путем ангельскаго жития шествующи и многия к Нему наставляющи, во благоухании мира в небесный чертог востекла еси, идеже моли, Егоже возлюбила еси, о чтущих благочестно память твою.

Ин тропарь, глас тойже:

Богатство свое нищим расточивши и славу княжескую ни во что же вменивши, обручника временнаго, красная дево, возгнушалася еси и, уневестившись Жениху Христу, Тому, якоже вено (брачный выкуп), чистоту душевную и телесную принесла еси, Евфросиние. Емуже ныне в веселии предстоя, поминай нас, чтущих память твою.

Кондак, глас 8:

Избранней Богом от самаго рождения и призванней на служение Ему, в чине ангельстем Господеви послужившей свято, и преподобно пожившей, и ныне с небесными силами Господа восхваляющей, о нас же, грешных, пред Господом ходатайствующей, с радостию и любовию воззовем: радуйся, Евфросиние, невесто Христова всечестная.

Ин кондак, глас 8:

Чистое свое девство и честное милостынею, яко светильник елеем, украсившую и с мудрыми девами в пресветлый чертог Христов вшедшую, Евфросинию славную ублажим, и, припадше к честным ея мощем, насладимся ея благоухания и умильне к ней возопиим: яко имея дерзновение ко Христу Богу моли избавитися зловония страстей и спастися душам нашим.

Ин кондак, глас 4:

Превитавши от земли Полоцкия, отечество свое, яко Авраам, наследовавши, Евфросиние, землю высоку сообразну — Горний Сион, страданием постным яко жертву приносила еси милосердием своим, Давшему Себе за человеки Жертву благоприятну.

Молитва

О преподобная и приснопамятная всехвальная мати Евфросиние, Ангеле во плоти, богоизбранный сосуде Святаго Духа, Церкви Христовой похвало и украшение, монашествующих славо и утверждение, отечеству, обители твоей и всей стране помоще, покрове и защитнице! Ты еси, яко древо, насажденное при исходищих вод, плоды добродетелей твоих и благодатными даровании Святаго Духа украшенная, наставнице делом и словом, избранная, непорочная и добрая. Услыши ны, молящияся тебе и призывающия имя твое, имаши бо дерзновение у Господа. Испроси нам преспеяние в жизни добродетельней, огради сердца наша верою, надеждою и любовию и страхом Божиим, подай нам помощь в трудех и скорбех наших и, якоже попечение имела еси в житии твоем о обители твоей и иночествующих, тако и ныне потщися о нас, благопоспешити нас во всем: и обитель твою огради миром и защити от враг видимых и невидимых, да преуспевает и процветает в добродетелех. Изми ны от всякия нужды и тесноты, от лютых болезней и от нечаянныя смерти и приведи ны ко истинному покаянию при исходе из жизни сея; испроси нам у Господа Бога кончину мирну, безболезненну, непостыдну, Святых Таин причастну, и преведи ны чрез мытарства воздушныя, да не похитят нас истязателие грознии по грехом нашим, но да твоим заступлением и помощию возможем безбедно проити истязание воздушное, и милость получити, и предстати неосужденно страшному Престолу, и на Страшнем судилище сподобитися одесную стати Праведнаго Судии, и наследовати праведных часть. Ей, госпоже, всечестная мати, преподобная Евфросиние, помози нам молитвами твоими, огради нас и заступи от всяких козней вражиих, да сподобимся прейти время жизни сея непреткновенно и спасение получити молитвами твоими у Христа Господа, Егоже и сподо­бимся пети и славословити со Безначальным Отцем и со Святым Духом во веки веков. Аминь.