Тропарь, глас 1

От юности, преподобне Феодосие, желание твое ко Христу Богу вперив, Егоже ради град и отечество оставль, и славу суетную яко прах вменив, последовал еси преподобному Димитрию, и обители его сожитель был еси; преселився ко граду Тотьме и в междоречие вселився, постом и бдением и власяным одеянием и веригами тело твое удручал еси. Сего ради Бог, видев твоя труды, и по преставлении чудесы обогати тя, бесы изгоняеши, и слепыя просвещаеши, от всяких недуг и бед избавляеши приходящих к тебе с верою и вопиющих: слава Давшему ти крепость, слава Венчавшему тя, слава Дарующему тобою всем исцеление.

Ин тропарь, глас 2

От мирскаго мятежа изшед, преподобне отче наш Феодосие, и в тихое пристанище достиг, преподобному Димитрию сожитель был еси, и оттуда, Божиим Духом направляемь, во град Тотьму преселился еси, и во отоцех водных обитель себе воздвигл еси, иже равноангельное житие пожив, последовал еси Христу, Егоже ради власяну ризу и вериги на теле своем носил еси. Смирением и нищелюбием украсився, славу суетную презрел еси и отеческое имение добре расточил еси, молением же к Богу и слезными струями бесы посрамил еси, темже по успении твоем Христос даром чудес обогати тя. Имея убо дерзновение ко Господу, преподобне отче наш Феодосие, моли Христа Бога, да спасет души наша.

Кондак, глас 8

Воздержанием плоть изнурил еси, и непрестанными молитвами яко Ангел возвысился еси, струями же слезными бесовския полки погрузил еси, и ныне во свете невечернем ликуеши у Христа Бога, и приходящим ко святому твоему гробу неоскудно исцеление подаеши, верою вопиющим тебе: радуйся, отче Феодосие богомудре.

Молитва

О добрый наш пастырю и богомудрый наставниче, преподобне отче Феодосие! Услыши нас, грешных, молящихся тебе и призы­вающих в помощь скорое предстательство твое; виждь нас, грешных, в толицех обстояниих сущих, виждь нас, немощных, отвсюду уловля­емых, всякаго блага лишенных и умом от малодушия помраченных, потщися, угодниче Божий, не оставити нас в греховном плену быти, да не будем в радость врагом нашим и не умрем в лукавых дея­ниях наших. Моли о нас, недостойных, Спаса Господа, Емуже ты со Бесплот­ными лики предстоиши. Милостива к нам сотвори Содетеля нашего в нынешнем веце и в будущем, да не воздаст нам по делом нашим и по нечистоте сердец наших, но по Своей Его благости да воздаст нам, на твое бо ходатайство уповающе, твоим предстательством хвалимся, твое заступление на помощь призываем и, к цельбоносным мощем твоим припадающе, недостойнии, исцеления просим: избави нас, угодниче Христов, от злых, находящих на нас, и укроти волны страстей и бед, восстающих на нас, да ради святых твоих молитв не обымет нас напасть и не погрязнем в пучине греховней и в тине страстей наших. Моли, преподобне отче Феодосие, Христа Бога на­шего, да подаст нам мирное жительство, оставление грехов, душам нашим спасение и велию милость. Аминь.