Тропарь, глас 7

От юности, отче, избран и возлюблен был еси Господом Богом, иже, провидя доброе твое произволение, научи тя приити к препо­добному угоднику своему Кириллу всеблаженному, от негоже наставлен быв на путь спасения, в страсе Божии и чистоте душевней, в бла­гоговении же и непрестанных к Богу молитвах житие твое непорочно прешел еси. И ныне со дерзновением предстоя на небесех Престолу Христову, отче Мартиниане всеблаженне, не престай моля Христа Бога спасти и помиловати души наша.

Кондак, глас 8

Благоизволив, преподобне, от юнаго возраста работати Господеви день и нощь, в страсе Божии и благоговении чистоту душевную соблюл еси, в молитвах же и бдениях ум твой предочистил еси:
в подвизех же и злостраданиях тело твое изнурив, вся добродетели духовныя исправил еси, и образ хотящим по тебе спастися явился еси. Темже ныне присно зря на небесех Пресвятую Троицу, молися, всеблаженне, даровати душам нашим спасение и житию нашему исправление, да вси верою вопием ти: радуйся, преподобне Мартиниане отче наш.

Молитва преподобным отцам Ферапонту

и Мартиниану Белозерским

О богоблажении и преподобнии отцы наши, Ферапонте и Мар­тиниане! Молимся вам от сердца и с любовию вопием, да нас, непотребных, уразумите и просветите и своими молитвами укре­пите некая похваль­ная словеса принести в память вашего преставле­ния не бо в муд­рос­ти слова дерзаю глаголати, но со многою верою
и лю­бовию чадолюбивым отцам сия приношу. Вы убо, преподобнии, сами наши недостатки наполните, без вышея бо помощи, блаженнии, ничтоже может благо сотворити, но, пребывающе в дому Пречистыя Бого­родицы вашея ограды, надеемся вами, благими предстателями, свободни пред Богом явитися, необладанными быти от враг видимых и неви­димых. О пастырие добрии, истиннии строители винограда Христова, отцем славо, преподобным единонравнии, праведным единовсельницы, иноком наставницы и общему житию соверши­тели изряднии. Ныне на небесех Святей Троице предстоите со всеми угодившими Ей. Ныне убо, о богоблаженнии и преподобнии отцы, помяните стадо свое, еже мудре собрасте, и соблюдите богодаро­ван­ную вашу паству и, яко ча­до­любивии отцы, посещайте и не презри­те нас, чтущих верою и лю­бо­вию пречестную и многорадостную вашу память. Сохраняйте нас и соблюдайте от всех видимых и невидимых враг, приидите посреде нас невидимо и всех нас моления, Богови возсылаемая, при­имите и принесите сия ходатайственне всех Творцу и Избавителю, Иже в Троице Святей покланяемому истинному Богу нашему, яко да согрешением нашим оставление получим в день судный благода­тию и человеколюбием Господа нашего Иисуса Христа, с Нимже Отцу слава и Святому Духу вкупе, Трисиянному Божеству, ныне и присно и во веки веков. Аминь.