Тропарь, глас 1:

Житий преподобных отец Печерских списателю известный, святителю Христов Симоне всеблаженне, молися прилежно с ними Христу Богу, да управит в мире живот наш и в книги животныя да напишет ны, спасая души наша.

Кондак, глас 2:

Святительства одеждою, аще и достойне одеялся еси, обаче тем не возносяся, желал еси паче сметием (сором, грязью) пред враты лавры Печерския поврещися, смиренномудре Симоне. Темже, не аки сметие, врат вне, но, яко сокровище, внутрь святыя пещеры положен быти сподобился еси, и ныне на Небеси Господеви предстоя, молися о нас, чтущих тя.

Молитва

О всехвальный и всечестный архиерею, святителю Христов, преподобне и богоносне отче Симоне! Призри с свойственным тебе благосердием от высот небесных, идеже со Ангелы и всеми святыми Господу славы предстоиши, на нас, недостойных и долу преклонных, смиренных же и грешных, притекающих к многомощному предстательству твоему с верою, любовию и упованием. Простри молитвенно преподобныя руце твои ко Господу и Владыце и испроси от щедродательныя Его благостыни оставление согрешений наших вольных и невольных, покаяние сердечное, здравие душевное и телесное, житие мирное и безмятежное, воздуха благорастворение, земли плодоносие, житейских потреб довольство, во всем благое поспешение, и да не во зло обратим даруемая нам благая, но во славу пресвятаго имене Его и во спасение наше. Еще же, припадающе, молим тя, потщися, благосерде, предстательствовати ко Господу Человеколюбцу, да избавит нас по велицей Своей милости от всяких бед и скорбей, от всяких недугов и болезней, от внезапныя смерти и всех озлоблений, от всяких козней врагов видимых и невидимых и от всякаго зла. Да укрепит в нас правую веру и благочестие нелицемерное и да подаст нам силы к борьбе со страстьми и похотьми нашими, да соблюдет нас от нечестивых и душепагубных учений неверия и суеверия, имиже наветуется в нас святоотеческая православная вера, и да избавит нас от всяких приражений духа, иже ныне действует в сынех противления. Да всадит в сердца наша дух смирения и кротости, дух братолюбия и незлобия, дух целомудрия и терпения, дух святыя ревности о славе Божией и спасении ближних. Да призрит благоутробно на всяку душу, требующу благодатныя Его милости, и дарует по неизреченным щедротам Своего человеколюбия болящим исцеление, скорбящим утешение, малодушным успокоение, унывающим ободрение, страждущим ослабу, бедствующим помощь, сирым покров, бесприютным пристанище, обидимым защиту, злословимым терпение, уничижаемым великодушие, гонимым заступление, оклеветанным оправдание, и всем, во всяких нуждах и злостраданиих сущим, душевную отраду и скорое избавление. Ей, святче Божий, буди теплый молитвенник и прилежный ходатай ко Господу о всякой души верных твоих чтителей, ищущих твоея помощи, да никтоже во уповании своем на тя посрамлен будет, но вси предстательством твоим да обрящут во всяких обстояниих благодать и милость Всещедраго Бога. Емуже подобает всякая слава, честь и поклонение, ныне и присно, и во веки веков. Аминь.